ابيض ميح ومتعرفش اي حاجه عن السفر، تعالي وانا هقولك ع شويه تفاصيل كويسه هتنفعك لو حبيت تسافر

1- ازاي تعمل باسبور ؟
تروح القسم التابع ليه محل اقامتك ف البطاقه ويكون معاك
- تلات صور 4 في 6 خلفيه بيضاء
- البطاقه وصورة منها
- المؤهل وصورة منه لو خريج ومش مثبوت ف البطاقه
- شهادة قيد من الكليه لو طالب
هتملي استماره وتدفع 305 جنيه رسوم وتستلمه بعد 3 ايام

( الرجاله تجيب شهادة الاعفاء او التأجيل للتجنيد )
.-------------------------------------------------

2- انواع الفيز

* فيزا مسبقه من السفارات
ودي لازم تروح السفاره عشان تقدم علي الفيزا بنفسك ودي لمعظم بلاد العالم وليها متطلبات زي حساب في البنك و جواب من الشغل انك شغال وغيرها او شركة السياحة الي بتخلصهالك

* فيزا عند الوصول
ودي بتحصل عليها عند الوصول علي باسبورك في مطارات البلاد ال رايحها بعد دفع رسوم الدخول
ومن امثلتها لبنان - تنزانيا - كينيا - المالديف - لاوس

* بلاد بدون فيزا
ودي مش بتحتاج لدفع اي رسوم او تقديم اي مستندات لاي سفاره وبتختم دخول مجانا عند الوصول للبلاد دي
زي ماليزيا - اندونيسيا - هونج كونج
.

* بلاد بفيزا اونلاين
ودي عباره عن بلاد بتدخلها عن طريق انك تدخل موقعهم الالكتروني وتملي ابلكيشن الفيزا وتدفع رسوم الفيزا اونلاين وبيتبعتلك ايميل تطبعه وتسافر بيه
.
-------------------------------------------------------------
3- ايه الفرق بين صلاحيه الفيزا وفتره الاقامه جوة البلد ال هتروحها ؟

صلاحيه الفيزا يعني ان الفيزا دي صالحه للاستخدام من يوم كذا ل يوم كذا
مينفعش تستخدمها قبل المعاد المحدد او بعد المعاد المحدد
.

زي مثلا اللانشون .. بيكون مكتوب عليه تاريخ صلاحيه شهر مثلا
اهو انت مسموحلك تستخدم اللانشون دة خلال فتره شهر
.

مينفعش تاكل اللانشون بعد انتهاء مدة الصلاحيه اللي هي الشهر دي والا هيجيلك تسمم
.

نفس الكلام هنا مينفعش تستخدم الفيزا قبل او بعد مدة الصلاحيه والا هيبقي كسرت الفيزا يعني خالفت قوانين البلد اللي هتروحها وقعدت بشكل غير قانوني
.

فتره الاقامه .. هي الفتره اللي مسموحلك تقعد فيها جوة البلد في اطار صلاحيه الفيزا
.

يعني مثلا خدت فيزا single من فرنسا صلاحيه 3 شهور من شهر 9 لشهر 12 مثلا
لكن اقامه هناك اسبوع بس
.

معني كدة انك مسموحلك تقعد في منطقه الشنجن اسبوع واحد بس .. لكن تسافر في اي وقت من ال 3 شهور دي .. ولكن جوة منطقه الشنجن نفسها تقعد اسبوع واحد
.
-------------------------------------------------------
4- يعني ايه طيران ترانزيت والفرق بينه وبين الدايركت

ترانزيت يعني بتاخد الرحله علي طيارتين بدل طياره واحدة
.

تطلع من القاهرة علي بلد وسطانيه بطياره .. البلد الوسطانيه دي تقعد تستني فيها شويه لغايه لما الطياره التانيه توصل وتروح تركبها عشان توصلك ل البلد النهائيه اللي عايز تروحها فعلا
.

والبلد الوسطانيه دي لا يحق لك انك تدخلها ابدا الا بفيزا ( ما عدا بعض الحالات زي ال معاهم فيزا امريكا وكندا واستراليا وزي بلاد الشنجن للي معاه تأشيرة شنجن لان الموضوع فيهم مختلف )
.

مثلا عايز تروح المالديف ترانزيت دبي

هتركب طياره من القاهرة ل دبي .. دبي دي هتبقي البلد الوسطانيه اللي هتقعد تستني فيها شويه .. بعدين تركب من دبي للمالديف بطياره تانيه

ومينفعش تدخل دبي الا بفيزا يعني هتفضل قاعد في المطار مستني لغايه لما تيجي طيارتك التانيه

.

طب هنعمل ايه في الشنط ؟؟؟
.

الشنط مش هتستلمها الا في الوجهه النهائيه يعني الشنط بتاعتك هتتشحن من القاهرة ومش هتشوف وشهم تاني غير في البلد النهائيه بتاعتك مش هتستلمها في الترانزيت ابدا
.

( الا اذا مكتوب في تذكرتك self transfer ساعتها بس هتضطر انت تستلم الشنط بتاعتك بنفسك في الترانزيت الاول ودي حالات محدودة اوي )

.

في بلاد بتكون بعيدة اوي في امريكا الجنوبيه ساعتها بتاخد 2 ترانزيت يعني بتركب 3 طيارات وبتقعد في 2 بلد وسطاني مش بلد واحدة
.

في الاغلب الترانزيت بيكون ارخص بكتير جدا من الطيران المباشر ابو رحله واحدة و طياره واحدة

.--------------------------------------------------------
6- يعني ايه فيزا الشنجن

هي فيزا مجمعه ل 26 دوله من اوروبا تتيح لحاملها التنقل داخل باقي ال 26 بلد بدون اختام او تأشيرات مسبقه وهما :

النمسا، بلجيكا، التشيك، الدنمارك، أستونيا، فنلندا، فرنسا، ألمانيا، اليونان، هنغاريا، أيسلندا، إيطاليا، لاتفيا، ليتوانيا، لوكسمبورغ، مالطة، هولندا، النّرويج، بولندا، البرتغال، سلوفاكيا، سلوفينيا، إسبانيا، السويد، سويسرا

( ساعات بيسموها شنجل متفهمش ازاي :D )
.-------------------------------------------------

7- فيزا مالتي وفيزا سنجل

فيزا سنجل : يحق لحاملها الدخول مرة واحدة فقط للبلد الحاصل منها علي التأشيرة وعند خروجه منها لا يحق له الدخول اليها مرة اخري الا بعد الحصول مرة اخري علي فيزا

فيزا مالتي : يحق لحاملها الدخول اكثر من مرة للبلد الحاصل منها علي التأشيره بشرط توفر ايام اقامه كافيه في كل مرة دخول خلال فتره صلاحيه الفيزا
.
--------------------------------------------------
8- الفرق بين شهادة التحركات و التصريح الامني :

شهادة تحركات
دي شهادة بتوضح تحركاتك من مصر للخارج في اخر 7 سنين وبتتطلب لو بتقدم علي فيزا الشنجن لاول مرة
( كل سفارات الشنجن بتطلبها باستثناء فرنسا - هولندا - بلجيكا )
بتتعمل في 7 ايام لو من مجمع التحرير
بتتعمل في شهر لو من محافظتك
رسوم الشهادة 10 جنيه
.

التصريح الامني
شهادة من مجمع التحرير بتعملها اثناء السفر من مصر اللي اعمارهم من 18 ل 40 لبعض الدول
زي قطر - تركيا - جورجيا - كوريا الجنوبيه - ماليزيا - اندونيسيا - لبنان - الاردن - الكيان الصهيوني - العراق - جنوب افريقيا

لو انت مكتوب في باسبورك وظيفه لن تحتاج الي اي تصريح امني لاي مكان باستثناء تركيا و جورجيا لازم تصريح امني في كل الاحوال

لو انت مكتوب في باسبورك طالب بتحتاج لدعوة من شخص موجود في البلد ال هتروحها ومش بتنفع فيزا السياحه العاديه

لو انت مكتوب في باسبورك حاصل علي ( بتمشي حسب مزاج الظابط ) ساعات بيطلبوا وسااعات لا .. ملهاش مقياس حاصل علي دي

الاجراءات بتروح مجمع التحرير بالباسبور والفيزا وصورة الفيزا وتكون حافظ اسم الوالد خماسي وبتدفع نص جنيه ثمن الاستماره وبتستلمها بعد اسبوع
.
------------------------------------------------------
8- يعني ايه هوستل ويعني ايه كاوتشسيرفنج

هوستل عباره عن بيت شباب ,, فندق مصغر ,, مفيهوش وسائل الفخامه والراحه زي الفنادق وبتبقي بارخص الاسعار وغالبا ب حمامات مشتركه وتصلح ل الشباب وال solo travellar

كاوتشسيرفنج
اقامه مجانيه عن طريق الاستضافه من خلال موقع couchserfing وبتتيح للمستضيفين باستضافه الناس بدون دفع اي مقابل ليهم
.
-----------------------------------------------------
لكل ظابط جوازات الحق في انه ميدخلكش بلده بدون ابداء اي اسباب حتي لو معاك فيزا البلد دي لكن علي رأي المثل امشي عدل يحتار عدوك فيك
.

فيه 4 عوامل بتخلي اي ظابط جوازات مُجبر انه يحترمك ويدخلك بلده :

1- معاك تذكره عودة مؤكدة
2- حاجز في فندق او هوستل والحجز مؤكد
3- عامل ترافل بلان للايام اللي هتقعدها ف البلد الفلانيه دي
4- معاك فلوس سواء كاش او كريديت

لو معاك الاربعه دول شبه مستحيل انه ميدخلكش ولازم هتدخل