نصائح هامة لمن يحب السفر للإمارات للعمل

السفر للامارات للعمل

عايز تسافر الامارات وتشتغل او تعرف حد عايز ؟

طب نرفع البوست ده ضروري جدا عشان محدش يقع في الفخ

طبعا ظروف البلد صعبة وكلنا عارفين وكله عايز يسافر ربنا يكرم الجميع يارب

الامارات حاليا اسهل بلد تقدر تسافر ليها والتكلفة لحد ما قليلة بس انا هقولكم علي شوية نصائح تاخدوا بالكم منها عشان هنا فيه كمية شباب حرفيا بتبات في الشارع لانهم اتنصب عليهم او سافروا بدون ما يفهموا الوضع الصحيح .

سوق العمل حاليا هنا صعب جدا والمنافسة فيه كتيرة قوي لان فيه هنود وفليبين وباكستان موجودين وارخص من المصريين بكتير عشان كده حضرتك لما تيجي هنا لازم تبقي مؤهل للعمل والمنافسة.

الإنجليزي أساسي لجميع المؤهلات العليا او أي عمل متعلق بالسياحة .

البرامج الالكترونية أساسية هنا كل واحد حسب تخصصه طبعا.

طبعا الاقامات للمصريين متاحة فقط في دبي يعني لازم تدور في دبي الأول او في أي شركة لها فرع في دبي.

بالنسبة للصنايعية هنا الوضع غير دول الخليج وبرده بيفضلوا الجنسيات التانية عن المصريين ومرتب الصنايعي في الشركات بيبقي في حدود 2000الي 2500 درهم.

نيجي بقي للمصاريف كل حاجةهنا غالية وكلكم عارفين الكلام ده .

السكن في دبي هتاخد سرير في غرفة من 8 افراد وتكلفتها في حدود 700 درهم الي900
حسب نظافة السكن وكده وبيبقي غالبا شامل نت وكهربا ومياه وغاز

الاكل بيكلف في حدود 400 درهم شهريا والكلام ده في حالة انك مشترك مع مجموعة وبتطبخ يعني اللي جاي زيارة يعمل حسابه علي اكل 600 لانه غالبا مش هيطبخ

الاتصالات في حدود 300 درهم لان لازم يبقي عند نت في التليفون عشان تعرف تتحرك وتفتح االلوكيشن وتروح المقابلات

المواصلات بقي قصة لوحدها وهتكلفك 300او 400 ودايما تخلي تحركاتك بالمترواو الاتوبيسات هيبقي ارخص لان التاكسي غالي جدا فتحة الباب ب 11 درهم

طبعا المبالغ تقريبي وبتختلف من شخص لاخر بس ده المتوسط وبرده تحط في حسابك انك كده لا اتفسحت ولا تعبت ولا عملت أي حاجة متوسط الشهر هنا من 1500 الي 2000

يبقي حضرتك وانت جاي تعمل حسابك علي 30000 مصري عشان تقدر تعيش وتلف ال3 شهور دول

لو اشتغلت بقي الدنيا بتتغير خالص لانك هتظبط حالك وهتاخد المرتب اللي يكفيك وهتتعايش بيه

طيب بعد كل الكلام المحبط ده حد هيفكر يسافر برده هقولك هنا لو انت شاطر وفاهم هتشتغل بسرعة وربنا هيكرمك المميز دايما بيشتغل

ازاي تبقي جاهز اول حاجة تشترك في جميع صفحات الامارات وتتابعها زي جروب الجالية المصرية -الامارات او المصريين في دبي او صاحبي في دبي والوسيط الاماراتي واي جروب ليه علاقة بالشغل والامارات وتابع بقي المشاكل والبوستات عشان تفهم الدنيا قبل ما تيجي هنا

انا كاتب البوست عشان أوضح وافهمكم الحقايق لاني يعز عليا ولاد بلدي يتبهدلوا هنا وخصوصا ان فيه مصريين فعلا بتبات في الشارع والمساجد لانهم اتعرضوا لعملية نصب مثلا

بالنسبة التأشيرات :
أنواع التأشيرات ( الفيز ) للامارات 2 ( اثنين ) ملهمش ثالث
1- زياره و دي يا اما شهر او 3 شهور ( الشهر ) سعر بيعها تقريبا 400 او 500 درهم ( 2000 الى 2500 جنيه مصري تقريبا )
(3 شهور ) سعر بيعها تقريبا 1200 درهم ( 6 الاف جنيه مصري )
2- أقامه عمل تكلفتها تقريبا 6000 ل 8000 درهم يعني من 30 ل 40 الف جنيه و المفروض برضه ان اللي بيدفع التكلفه دي الشركه اللي انت جاي عليها للعمل فيها .

طيب نيجي بقى للمهم اللي هو النصائح للي جاي :
متسمعش كلام حد في مصر يقولك عقد عمل في الامارات ب 10 الاف و لا 15 الف جنيه لانه ده مش عقد عمل دي زياره و هتيجي هنا تدور على شغل .
اعمل حسابك في انك تغطي مصاريف سكنك هنا الفتره اللي انت جاي تقعدها هنا يعني لو شهر او 3 شهور .
اعمل حسابك في مصاريف الاكل و الشرب اللي انا مقدرش احددهالك هتكون كام لان كل واحد حسب مقدرته.
انسى موضوع ان الدرهم ب 5 جنيه ده لانه مبينفعش انت هنا بتصرف بالدرهم مش بالجنيه يعني مثلا لو بتشرب سجاير علبه السجاير تقريبا 10 درهم و من اول أكتوبر هتزيد تبقى 20 درهم ( طبعا حسب النوع
وانت جاي لازم يكون معاك الف دولار بتتسال عليهم في المطار ويكون معاك حجز لفندق وكمان تذكرة عودة لان ضابط الجوازات بيسال عليهم وممكن يمنعك من السفر
وكمان لازم تبقي عارف انك جاي لسوق عمل مفتوح وبتتنافس مع جنسيات كتير يعني لازم تكون متمكن من شغلك ومميز فيه ومنمي مهاراتك ومحدد اهدافك
نحسبها تاني مع بعض بشكل بسيط
جنيه3500 تذكرة طيران فلاي دبي
تأشيرة فى حدود 6 او 7 الاف مصري والسكن هيكون فى عجمان او الشارقة .. لان دبى غالية هيكلف شيرنج مع 8 او اكتر في حدودد 800درهم
يعنى 4000 مصري ولو مع هيسكن شخص واحد هيكلف 1200 درهم
يعنى 6000 مصري وبالنسبة للاكل لو راح هايبر وجاب الاكل كله بتاع الشهر
هيكلف 600 درهم لو اكيل وعايش عشان الاكل يعنى 3000 مصري على الاكثر وبالنسبة للمواصلات كارت بيتشحن للباص وللمترو هيكلف اقل من 450 درهم فى الشهر يعنى 2250 مصري
الخلاصة
2000 + 7000 + 6000 X 3 { 18000 } +3000 { 12000 } + 2250 { 6750 } ==== 45000
ممكن نوفر ونقبل بالسكن بـ 800 درهم مجموع الزيارة الـ 3 شهور بدون عمل
وقتها ممكن المصاريف تقل الى 40000 مصري
معلومه لما تلاقى شغل فى حالة الزيارة سياحة .. مش لازم تخرج خارج الدولة
لا بتعمل بدل مغادرة وتدفع 2000 درهم او اقل تقريبا
الانجليزى من غيره مش هتعرف تعيش فى الامارات

على فكره انا لا باعمل تاشيرات و لا بابيع اقامات انا كل اللي اتمناه ان الناس تاخد بالها علشان ميتنصبش عليها و من كتر الحالات اللي بنقابلها هنا واضح ان الموضوع بقى اكتر من الأول بكتير

التاريخ: 15/9/2019 - الزيارات: 720

أضف تعليقك على المقال

code

  • شاهد منزلك اون لاين مباشره والتجول في اكبر شوارع أمريكا

محرك البحث

الاستفتاء

ماهو موقعك المفضل؟

57.63%

4.96%

37.40%

57.63% Complete
4.96% Complete
37.40% Complete

أطلب خدمتك الآن من محترفين أطلب الآن خدمتك من محترفين
COVID-19 Dashboard by the Center for Systems Science and Engineering (CSSE) at Johns Hopkins University التسويق الالكتروني| مهندس بترول مصرى| DZForums| best ptc sites |اختبارات الفيس بوك |العاب |دارى اونلاين للتسويق العقاري| |6 - friendsكم عدد ابطال المسلسل الشهير| DMCA.com Protection Status

شاهد منزلك اون لاين مباشره والتجول في اكبر شوارع أمريكا